Arfey ka roza Haji log jab Arafat key maydan mey jama hotey tab rahna ya esy bhee chand key Indian dates key mutabhik rakhna caheyee. Aur Arfey ke rozey English clendarkey mutabikh Kon sey dates Ko rakh na hoag.

Sawal:
Arfey ka roza Haji log jab Arafat key maydan mey jama hotey tab rahna ya esy bhee chand key Indian dates key mutabhik rakhna caheyee. Aur Arfey ke rozey English clendarkey mutabikh Kon sey dates Ko rakh na hoag.

Asked by: Adv. Adil Biyabani (Aurangabad, Maharshtra, India)
Asked on: 28-09-2014 Asked at: 12:28 pm
Asked in : Faham-e-Quran group
————————

Jawab:
Arafah ka roza chand ke mutabiq rakhana chahiye, jiss ilaqe mein jaisi chand ki date hogi ussi tarah roza bhi hoga.
Arafah ka roza 9 zilhajj ko rakhana chahiye, shamshi calendar ki tareekh koi bhi ho, qamari calender ki tareekh asal hai.

Iss ziman mein bohat se musalmanun ko ye galat fehami hai ke arafah ka roza tabb rakhein jab haji arafat ke maidan mein jama hoon.

Ye masala aasan aur common sense ka hai magar log bekar mein iss ko paycheeda bana rahe hain.

Aise logaun ka kehna hai keh, nabi s.a.w. ne hadith mein SIYAM YAUM ARAFAH (yani arafah ke din ka roza) ka zikar kiya hai na ke 9 zilhajj ka?
Main kehta hoon iss tarah bayan karna ye badi kam ilmi aur jahalat ki baat hai.

Main poochata hoon keh hajj ka tareeqa batate huwe ya amal karte huwe chand ki tareekh kahan bayan ki gayi hai, jaise 8 zilhajj, 9 zilhaj wagaira?.
Aap .s.a.w ne to haji ke a’amaal ko bunyad banate huwe yaume arafah ka zikar kiya hai. Aur yaume arafah se murad chand ki 9 tareekh yani 9 zilhaj hi hai.

Aayiye iss ziman mein ek hadith dekhate hain, Jo iss baat ki daleel hai ke hajj ka tareeqa bayan karte huwe chand ki tareekh bayan nahee ki gayi.
عَنْ عَبْدِ العَزِيزِ بْنِ رُفَيْعٍ، قَالَ: سَأَلْتُ أَنَسَ بْنَ مَالِكٍ رَضِيَ اللَّهُ عَنْهُ قُلْتُ: أَخْبِرْنِي بِشَيْءٍ عَقَلْتَهُ عَنِ النَّبِيِّ صَلَّى اللهُ عَلَيْهِ وَسَلَّمَ، ” أَيْنَ صَلَّى الظُّهْرَ وَالعَصْرَ يَوْمَ التَّرْوِيَةِ؟ قَالَ: بِمِنًى “، قُلْتُ: ” فَأَيْنَ صَلَّى العَصْرَ يَوْمَ النَّفْرِ؟ قَالَ: بِالأَبْطَحِ “، ثُمَّ قَالَ: افْعَلْ كَمَا يَفْعَلُ أُمَرَاؤُكَ

Tarjuma:
Abdul azeez bin Rafee’a kehte hain, unhaun ne Ans bin Malik r.a. se poocha keh,
rasoolullah s.a.w. ne (hajj ke darmiyan) YAUMUT TARWIYAH ke din zohar aur asar ki namaz kahan padhi?
Ans r.a. ne kaha, Mina mein.
Maine poocha, Aap s.a.w. ne YAUMUN NAFRA ke din Asr ki namaz kahan padhi?
Ans r.a. ne kaha, Abtah (yani Mahsib) mein. Phir Ans r.a. kahne lage, jiss tarah tumhare hukkam karte hain tum bhi issi tarah karo.
(Sahee Bukhari-1653)

Ab iss hadith ko gaur se padhiye, aur batayiye, ye YAUMUT TARWIYAH aur YAUMUN NAFRA kaunse din hain?
jo log YAUME ARAFAH ka shore machate hain, unhein to aise dinn ke bhi naam maloom hone chahiye. Jaise ye log kehte hain YAUME ARAFH yani Saudi arab ke hisab se 9 zilhajj hai.
To phir, YAUMUT TARWIYAH aur YAUMUN NAFRA saudi ke hisab se kaunse dinn hain?

Khair, YAUMUT TARWIYAH kehte hain 8th zilhajj ko, kyunki iss dinn log apne oontaun ko pani pilaya karte the.
Issi tarah YAUMUN NAFRA 12th zilhajj ko kehte hain, kyunki iss dinn mina se lauta jata hai.

Ab aap log batayein, aisi ahadith mein chand ki tareekh kahan bayan ki gayi hai?
Zahir si baat hai, aur ye common sense hai ke yaume arafah se murad 9 zilhajj hai, kyunki iss dinn haji hazrat arafat ke maidan mein jama hote hain.

Jo log arafah ke roze ko haaji hazrat ke arafat ke maidan mein jama hone se jodate hain unn se ye sawal poochiye,
1. haji hazarat arafat ke maidan mein kis tareekh yani date ko jama hote hain?
Jawab milega, zahir si baat hai 9 zilhajj ko. To phir yehi common sense hai ke hum 9 zilhajj ko roza rakhein. Jab hamare paas 9 zilhajj ho.

2. Kya arafah ka roza haji hazarat arafat ke maidan mein rakhate hain?
jawab milega bilkul nahee, to phir iss roza ko haji hazarat se jodana kaisa?

3. Agar bil-farz haji hazrat ke liye arafah ka roza rakhana hota to arafah ke roze ke baad wo kitne dinn baad eid karte?
Jawab milega roza rakhane ke bilkul dusre dinn.
To India mein jo log 8 zilhajj ko roza rakhate hain aur ek dinn chore kar eid kyun karte hain? Roza rakahne ke fauran dusre dinn eid kyun nahee karte?

4. Arafah ka dinn ek dinn hai ya 2 dinn?
Jawab milega ek dinn, to phir 8 aur 9 ko arafah maan kar 2 dinn ka roza rakhana kaise durust huwa?

5. Kya islam poore aalam ke liye aaya ya kuch khas logaun ke liye?
Jawab milega, poore aalam ke liye.
To phir wo shaks jo kisi aise door daraz ilaqe mein rahata hai jahan takk aaj ki technology nahee pahoonchaati hai to aaya wo arafah ka roza rakhe ya rakhana hi chore de? kyunki haaji log kab arafah ke maidan mein jama hote hain iss ka ilm unn logaun ko nahee ho paata.
Jo log iss roze ko haji hazrat ke arafat ke maidan mein jama hone se jodate hain wo asal mein ye dawa karte hain ke islam poore jahaan ke liye nahee hai.

6. Aaj se 100 saal pehle kay musalman arafh ka roza rakhate the?
Jawab milega zarur rakhate the,
Phir main kehta hoon, unn ko to roza rakhana hi nahee chahiye tha kyunki uss waqt itni technology nahee thi ke unn ko malooom ho jaye ke arafah ka dinn kab hai.

Dunya mein aise bhi ilaqe hain jahan raat hoti hai jab haaji hazrat araft ke maidan mein hote hain. To kya uss ilaqe ke log raat mein roza rakhenge? Jab ke islam mein raat ka koi roza nahee hai.

Behre kaif, Inn saari bataun se yehi sabit hota hai keh Arafah ka roza se murad harr ilaqe ke mutabiq 9 zilhajj (chand ki 9 tareekh) ka roza hi hai.

————————
for more Que. / Ans. , visit here:
http://www.sirajinamdar.com/index.php/all-que-and-ans/

Agar aap Siraj bhai ke QURAN aur SAHEE HADITH ke msgs chahte hain to iss number par “Add Me” likh kar msg send karein,

WhatsApp No.: +918007775053