kin janwar ki qurbani jayj he kya pade Bhes ki qurbani kr skate he

Sawal
Assalamalekum Siraj bhai sawal kin janwar ki qurbani jayj he kya pade Bhes ki qurbani kr skate he

Asked by: Rafeeq Mansoori (Dhar, MP, India)
Asked on: 30-09-2014, Asked at: 04:37 pm
Asked in : Faham-e-Quran 2 group
————————

Jawab:
Dekhiye iss zimen mein main ek baat kehna chahunga,
Hum musalman deen ko samazhane ke liye uss ilaqe ka harr baar khayal rakhate hain jahaan se ye deen aaya hai, yani saudi arab. Kyunki deen wahein se aaya hai aur ek dinn wahein simat kar rah jane wala hai.
Har wo aalim jo deen ki sahee samazh rakhata hai wo deen ke maamale mein QURAN aur AHADITH ke samazhane mein arabastan ke mahol aur uss waqt ke halat ko madde nazar rakhata hai.
Jo log deen ke mamale mein apni aqal ko ustad banaye huwe hain wo kehte hain islam saare jahaan ke liye hai aur ye kisi arab ki jaydad nahee hai iss liye sirf islam ko samazho aur samazhao. Iss mein arab ko aur arab ke uss waqt ke halat ko madde nazar na rakho.
Inn logaun ka ye usool qatyi taur par galat hai.
Hum log Ahlus Sunnah wal Jama’ah hain, aur hum deen ka har masala ko uss waqt ke siyaq aur sibaq ko madde nazar rakh kar hi samazhate hain.

Iss usool ke tahat dekha jaye to, Qurbani ke masnoon (yani sunnat se sabit shuda) Janwar 4 (qisam ke) hain, jinhein ALLAH ne QURAN mein bahimatul an’aam (yani paltu janwar) kaha hai.
Sure Ana’aam Sura no. 6 aayat no. 143.
1. A مِنَ الضَّأْنِ اثْنَيْنِ yani bhedh mein 2 qisam (narr wa maaddah)
2. B مِنَ الْمَعْزِ اثْنَيْنِ yani bakari mein 2 qisam (narr wa maaddah)
3. C مِنَ الْإِبِلِ اثْنَيْنِ yani Oont mein 2 qisam (narr wa maaddah)
4. D مِنَ الْبَقَرِ اثْنَيْنِ yani gaye mein 2 qisam (narr wa maaddah)
Ye kull 8 janwar huwe jisse ALLAH ne samaniyat azwaj ( ثَمَانِيَةَ أَزْوَاجٍ ) kaha yani 8 jode.

Yaad rahe, sure ana’aam ki ye aayat qurbani ke janwar ki fehrist bayan karne ke zimen mein nahee nazil huwi.
Magar jab hum ALLAH ke RASOOL s.a.w. ki zindagi aur sahaba-e-kiram ki zindagi dekhate hain to yehi maloom hota hai ke inn logaun ne inhi janwaraun ki qurbani ki hai.
To goya ke ye janwar qurbani ke masnoon janwar huwe. Inn janwaraun ki maujoodagi mein kisi aur bahimatul ana’aam ki qurbani durust nahee.

Ab sawal khada hota hai bhains ki qurbani ka.
Yaad rahe bhains saudi arab mein uss waqt paya nahee jaata tha. To zahir si baat hai iss janwar ki qurbani kabhi ALLAH ke RASOOL s.a.w. ne aur sahaba ne nahee ki hogi.
Magar kya a’arafe-aam mein bhains bahimatul ana’aam mein dakhil hai?.
Jawab hai, ji haan. India mein bhains paltu janwar hai aur iss ka istemaal waise hi hota hai jaise gaye ka.
Issi liye iss ummat ke ulema iss baat par muttafiq hain ke bhains halal janwar hai, iss ka gost khana halal hai.

Inn saari tafseelat se ye nateeja nikalta hai keh,
jiss ilaqe mein qurbani ke masnoon janwar muhayya na hoon, aur wahan bhains mohayya ho to iss ki qurbani karne mein koi harj nahee.
Aur jahaan Qurbani ke msnoon janwar mohayya hoon wahaan inhei janwaraun ki qurbani ki jaye aur dusre janwaraun ki taraf iltefaat na kiya jaye.
Agar koi shaks masnoon janwar ke hote huwe bhains ki qurbani kare to usse la’an ta’an aur malamat se na nawazein. Iss liye ke uss ne kisi haram janwar ki qurbani nahee di balke ek halal janwar ki qurbani di hai.
Bhains ki qurbani sirf na guzer halat ke tahat dena behtar aur oola hai.

————————
for more Que. / Ans. , visit here:
http://www.sirajinamdar.com/index.php/all-que-and-ans/

Agar aap Siraj bhai ke QURAN aur SAHEE HADITH ke msgs chahte hain to iss number par “Add Me” likh kar msg send karein,

WhatsApp No.: +918007775053