kya aap khwab ki tabir bata sakte ho? Maine khwab mein dekhi k kisi ka intekhal ho gaya aur unka jnaza jaa raha hai. Aisa q khwab aaya?

Aap ka sawal:
assalamulaikum…..
kya aap khwab ki tabir bata sakte ho……
maine khwab mein dekhi k kisi ka intekhal ho gaya aur unka jnaza jaa raha hai…….. aisa q khwab aaya…..???????

Jawab:
“kya aap khwab ki tabir bata sakte ho……”

Ji Nahee.
Aur na kisi ko iss baat ki juraat karni chahiye. Kyun ki ye kaam bohat mushkil hai.
Mushkil khwab ki tabeer batane wale ke liye nahee hai, wo to kuch bhi bata dega, magar jiske liye khwab bataya ja raha hai uske ke liye mushkil paida kar deta hai.
Allah ke nabi s.a.w. ne farmaya
“Khwab parindaun ke pairaun mein bandhe huwe hote hain, jab unki tabeer ki jati hai to wo khul jate hain (Musnad e ahmad)

Iss hadith se maloom huwa ke agar khwab ki tabeer bayan karne wale ne apni kam ilmi ki bunyad par khwab ki tabeer agar galat bayan ki to waisa hi hoga.

“maine khwab mein dekhi k kisi ka intekhal ho gaya aur unka jnaza jaa raha hai…….. aisa q khwab aaya…..???????”

Aayiye thoda khwab ke mutalliq jante hain,
1. Khwab 3 qisam ke hote hain.
A) Rehmani khwab yani wo khwab jo allah ki taraf se hote hain.
B) Shaitani khwab yani wo khwab jo shaitan aur jinn ki taraf se hote hain.
C) Nafsaani khwab yani wo khwab jo aam taur par insaan dekhta hai jo ke neuatral hote hain.

2. Aap ne jo khwab bayan kiya hai, uss mein agar aap darr gayi thi, ya uthane ke baad aapko bechaini ya kisi qisam ki tashweesh ho rahi thi to wo shaitani khwab hai.
Aur main samazhta hoon aap ka ye khwab aisa hi hai.

3. Apne khwab ko kisi ke aage bhi bayan nahee karna chaihiye, chahe wo achcha ho ya bura. Kyun ki allah ke rasoll s.a.w. ne farmaya
“Agar koi apana khwab bayan nahee karta to wo khwab ya wo shaitan uss ko nuksaan nahee kar sakta (Sahee muslim aur sahee bukhari)

Iss hadith se maloom huwa ke khwab hamein nuksaan pahooncha sakte hain agar hum usko bayan karein.

4. Sachche khwab ussi shaks ko dikhayi dete hain jo sab se sachcha ho.

5. Khwab ki tabeer bayan karne ke liye quran aur hadith ka bohat ilm chahiye.

6. Ahadith mein allah ke rasool s.a.w. ne khwab ki tabeer bayan ki hai. Lihaza jo quran aur hadith ka ilm rakhta hai, aisa shaks uss khwab ki tabeer bata sakta hai jiska zikar quran aur hadith mein aaya hai ya uska kuch ishara milta ho.

Aakhir mein main aap se ek sawal karta hoon.
Ek bus hai jiss ke talluq se aisi afwah hai ke uss mein kisi ne BOM rakha hai.
Kya aap aisi buss mein safar karengi?
Behtar rasta kausa hoga jo aap pasand karengi?
1. Bus mein safar karna
Ya
2. Bus mein safar na karna.

Aap ko koi bhi khwab dikhayi de usko aap ek bus hi samazhein jis ke talluq se ye afwah hai ke uss mein BOM hai.