Please explain in detail the rules of iddat for women in islam???? Please explain the reasons why it is done???

Aap ka sawal:

Please explain in detail the rules of iddat for women in islam???? Please explain the reasons why it is done???

 

Jawab:

Shoul i give the answer in english or urdu?

 

 

I think its better in urdu. Other members will also be benifited.

 

Iddat ka lafz 3 jagah istemal hota hai

1. Tallaq ya khula ki iddat

2. Tallaqshuda Hamila ki iddat

3. Bewa ki iddat

 

Mera andaza hai ke shayad aap ye nahee pooch rahi hain balke iddat se murad haiz (m. c.) le rahi hain.

 

Khair mera andaza galat bhi ho sakta hai. Iss liye main iddat ka wo sahee mana bayan karta hoon jo maine ooper zikar kiya.

 

Main iddat ki tafseel ke saath saath iski wajuhaat bhi bayan karta jaoonga.

 

 

Tallaq ki iddat:

—————

3 TOHAR yani 3 pakeezgi.

 

Jab shohar apni biwi ko pehli tallaq deta hai (chahe tallaq tallaq 100 martaba kyun na kaha ho wo ek hi tallaq hogi) to wo aurat ussi shohar ke ghar rahegi aur ek haiz se paak hogi. Agar iss darmiyan shohar usko ruju kare to wo usi ki  biwi hogi. Aur agar irada aur bhi pakka ho tallaq ka, to pehle haiz se paak hone ke baad usko doosri tallaq dega. Iss waqt bhi wo ussi ke ghar rahegi dusra haiz aane tak, ruju karle ya ruju ho jaye to theek warna theesri tallaq di jayegi aur dusre haiz ke baad theesra TOHAR bhi usi ghar mein guzaregi. Agar ruju kiya ya ruju karegi to theek warna jab wo theesre haiz se paak hogi to uss ke ghar nahee reh sakti kyunki wo hamesha ke liye uski biwi na rahi illa ye ke qudarti taur par HALALA ho jaye.

Ye hai tallaq ka sahee tareeqa quran aur sunnat se. Iss mein behtar aur achcha ek aur tareeqa bhi hai wo hai 9 TOHAR ki iddat.

 

Tallaq mukammal hone ke liye aur dusri shadi ke liye jo aurat intezar karti hai usko iddat kehte hain.

Iddat mein bithane ki wajah ye hai ke kisi ka nutfa kisi aur ki taraf mansoob na ho. Jaise agar koi shohar ghusse mein aakar tohar yani pakeezgi mein apni biwi ko tallaq deta hai aur wo aurat apni iddat mukammal kiye bagair dusri shadi karti hai to ab jo aulad hogi wo kis ki hogi ye pata lagana mushkil ho jata hai.

 

 

Khula ki iddat:

Ek TOHAR

yani ek haiz ki iddat guzarne ke baad ab wo chahe to dusri shadi kar sakti hai.

Iski bhi wajah yehi hai taake aurat hamila ho to maloom ho jaye ke aulad kis ki hai.

 

 

Tallaqshuda Hamila aurat ki iddat:

——————–

Uska waza’a hamal.

 

Yani jab uski delivery ho jayegi aur nifaas ka waqt guzar legi to agar wo chahe to dusri shadi kar sakti hai.

Iss lambe muddat wali iddat ki bohat si wajuhat hain.

1. Aulad ka masala hall karna

2. Mutallaqa (tallaqshuda) ke naan nafqe (khana aur rehna) ki zimmedari shohar par rakhana.

3. Aurat ki sahee dekh bhal ho sake in nazuk dinaun mein.

 

 

Bewa ki iddat:

————–

4 mahine 10 dinn.

 

Jiska shohar marr jaye wo 4 mahine 10 dinn iddat guzaregi.

 

Iski bhi kayi wajuhaat hain. Jaise

1. Marne wala marne se pehle apni biwi se sohbat ki ho to wo iss iddat mein zahir ho jayega.

2. Aurat shoke (matam) manayegi yani apna banao singar jeb wa jeenat ikhtiyar nahee karegi.

 

————————–

 

Ho sakta hai iss mein ki kayi batein aap ko ziyada samazh mein na aaye. Magar ilm hasil karte rahiye to allah aasani bhi karega.

 

Jawab ko kam az kam 2 ya 3 martaba dhyan se padhe.

 

 

Agar aap ka sawal HAIZ par tha to zarur batayein main iska bhi jawab de deta hoon.