Siraj Bhai kya Sufism ka Islam may koi concept Hai. Quran o hadees Ki roshni may wazahat se bataey

Sawal:
Siraj Bhai kya Sufism ka Islam may koi concept Hai. Quran o hadees Ki roshni may wazahat se bataey.

Asked By : Mohd Javed (Parbhani, MH)
Asked on : 22-10-2014, 10:43am
Asked In : Faham-e-Quran 4 group.
—————-

Jawab:
Ye unwan bohat bada hai, magar main koshish karunga keh iss ko mukhtasar likh sakoon.
Sufism ya sufiyat ko tasawwuf bhi kehte hain.

Agar islam musalman ke hisab se hai aur musalman ke amal se samazha jaata hai, to yaqeeqan sifism ka tasawwur islam mein hai.
Aur agar islam naam hai ALLAH aur uss ke rasool s.a.w. ka, to qasam ALLAH ki Sufism yani sufiyat ka islam mein koi concept, koi tasawwur nahee.

Sufiyat ye ek aisa unwan hai jiss ko chedana yani 90% se ziyada musalmanaun se dushmani lena hai.
Sufiyat ka asar harr aam wa khas par hai. Sufiyat ka talluq jahaan baraye raast aqeede se hai wahein iss ka talluq baraye raast shariyat-e-islamiya ke amal se bhi hai.

Musalmanaun ki iss sufiyat ki tareekh ko dekhate huwe, ye kehna kuch galat na hoga keh sufiyat musalmanaun ke liye ek shajar-e-mamnoo’a ki haisiyat rakhata hai.
Yani ek aisa darakht jiss se bachane ki harr aam wa khas ko sakht zarurat hai. Jiss ke qareeb jaate hi taqwa wa parhezagari ka libas utar jaata hai, aqal wa samazh sab jaati rehti hai, QURAN aur SAHEE AHADITH ke ilm se na balad aur na aashana hota jaata hai.
Ab aap soch rahe hoonge keh ye baat main kaise keh raha hoon?
Log kehte hain, islam mein jab kisi ki Ph. D. ho jaati hai to wo soofi bann jaata hai, To phir hum ne ek qadam aage badhate huwe sufiyat par hi Ph. D. kar li, aur issi ki bunyad par hum ne ye nateeja bhi nikala.

Sufiyat ke kya maane hain aur ye lafz kaise bana, iss ki bilkul zarurat nahee. Kyunki agar iss ki ibteda aur bunyad burayi par huwi thi to yaqeenan iss ke samarat bhi bure hi nikalenge. Aur agar iss ki ibteda aur bunyad achchayi par huwi thi, to phir iss ke samarat aur nateeje itne bure kyun hain?.

Sufiyat musalman ke liye sab se ziyada nuksandhah iss liye hai kyunki ye aqeede ke bigad ka sab se bada aur asal sabab hai. Aur islam mein aqeede ki badi ahmiyat hai. SAHEE AQEEDA hi musalman ko jannat mein le jayega, aur nake aur saleh Aa’mal issi aqeede ke taabe’a hote hain.

Aur yehi wo sufiyat hai jiss ke faiz se harr zamane mein saare dharam, adyan aur gumrah firqe mustafeez hote aur panapte rahe hain.
Sufiyana afkaar, dunya bhar mein phaile huwe harr qisam ke jadeed wa qadeem falsafaun aur kharafat ka murakkab hai.
Dunya ka koi bhi kufr, zindiqhana aqeeda aur mulhidana aqeeda aisa nahee jo sufiyana afkar mein dakhil ho kar soofi aqeede ka juz wa hissa na bann gaya ho.

Sufiyat ki bunyad chand bunyadi aqaid par hai. Jinn mein se ek hai “WAHDAT-UL-WUJOOD” ka aqeeda.
Iss aqeede se ye sabit kiya jaata hai keh qaynaat mein jo kuch maujood hai wo sab ALLAH hi hai (astagfirullah).
Goya keh iss aqeede se harr cheez mein ALLAH ke hone ka dawa kiya jaata hai. Aur issi ghinawne aqeede ko (ALLAH maaf kare) baaz ulema-e-sooa ne awwam ki bhari majlis mein iss ka iqrar kiya hai. Aur kaha hai ke hindu ki muratiyaun mein bhi ALLAH maujood hai.
Agar yehi aqeeda ek hindu rakhe to wo kafir kaise huwa?
Ek hindu kehta hai, keh “Harr kankar mein shankar hai”.
To iss ka ye kehna kaise galat huwa?
Agar hindu har kankar ko shanke keh kar uss ki pooja wa upasana karta hai to wo kafir kaise huwa?
Jab keh inhein sufiyana aqeede ke mutabiq hi to harr cheez mein ALLAH maujood hai, to kyun na harr cheez ki ibadat ki jaye? (astagfirullah, na’auzu billah).

Aayiye iss ziman mein QURAN kya kehta hai dekhate hain.
ALLAH kahan hai, iss talluq se ALLAH kehta hai.
الرَّحْمَنُ عَلَى الْعَرْشِ اسْتَوَى

Tarjuma:
Rohman (ALLAH) arsh par mustawi hai.
(Sure Taha 20 : 5)

Yehi baat ALLAH ne QURAN ke dusre muqamaat par bhi kahi hai, jaise
Sure A’araaf 7 : 54, Sure Yunus 10 : 3, Sure Ro’ad 13 : 2, Sure Furqaan 25 : 59, Sure Sajda 32 : 4, Sure Hadeed 57 : 4.

Ab yahan ek ishkaal yani shak ye paida hota hai keh QURAN mein to ye bhi hai keh ALLAH hamare saath hai.
Iss ishkaal ko iss tarah door kijiye keh, Yaqeenan ALLAH hamare saath hai, magar ILM ke eatebaar se. Aur ALLAH apni zaat ke eatebaar se ARSH par mustawi hai.

Inn ka ek aur aqeeda hai “HULUL” ka aqeeda.
Iss aqeede ke hisab se, ek banda ALLAH ki ibadat karta rehta hai, karta rehta hai yahaan takk keh ek dinn ALLAH ki zaat uss ke andar sama jaati hai. Iss ke baad uss par WAJD ki kaifiyat taari hone lagti hai. Iss kaifiyat mein wo apne aap ko ALLAH bhi kehta hai aur saari qaynaat ka rabb bhi.
Issi aqeede ki bunyad par baaz sufiya FIRAUN ko afzal tareen mowahhid kehte hain, kyunki uss ne QURAN mein ye dawa kiya keh ANA RABBUKUL A’ALA yaani mein hi tumhara sab se bada rabb hoon.
(Sure Nazi’aat 79 : 24).
Sufiya kehte hain firaun ke dawe ki wajah ye hai keh iss ne haqeeqat ko pehchan liya tha, aur ALLAH ki zaat iss mein sama gayi thi. Issi liye FIRAUN bhi jannati hai.

Inn ka ek aur bunyadi aqeeda ye hai keh SHARIYAT ek alag cheez hai aur TAREEQAT ek alag cheez.
Ye dono aapas mein kabhi nahee milte, dono mutzad aur opposite hain, magar phir bhi dono seedhe jannat mein le jaate hain.
Ya iss se badh kar inn ka ye kehna hai ke sirf shariyat insan ko jannat mein nahee le ja sakti. Tareeqat ke bagair shariyat bekar hai (astagfirullah).

Sahriyat ALLAH ki taraf se nazil huwi hai aur tareeqat inn sufi hazrat ki banayi hiwi hai,
Iss talluq se ALLAH kehta hai,
الْحَقُّ مِنْ رَبِّكَ فَلَا تَكُونَنَّ مِنَ الْمُمْتَرِينَ

Tarjuma:
Haq (yani shariyat) tumhare rabb ki taraf se hai, lihaza kabhi iss mein shak karne walaun mein na hona.
(Sure Baqarah 2 : 147 , Sure Aale Imran 3 : 60 , Sure An’aam 6 : 114 aur Sure yunus 10 : 94)

Inn sufiyaun ke tareeqat mein namaz roze sab maaf hain yani ye log uss tarah namaz nahee padhate jiss tarah ALLAH ke rasool s.a.w. ne bataya hai, balke inn ka namaz ka tareeqa alag hai, inn ki namaz dill mein hoti hai. FAJAR iran mein to ZOHAR iraq mein, phir ASAR madeena mein aur MAGRIB khane kaaba mein aur ISHA wahaan jahan inn ka dill chahta hai, yani dunya mein ya dunya ke bahar, ya kabhi kabhi seedhe ARSH par hi inn ki namaz hoti hai. Aur yehi unn ki daliy routine hai.

Sufiyat mein saare paagal, majzoob, launde baaz, hum jinsi ke khugar aur aadi, balke saray aam khulam khulla janwaraun se badd fe’ali karne wale auliya ALLAH hote hain (astagfirullah).
Aap logaun ko sufiyaun ke aise bhi waqiyaat sunane ya padhane mein aayenge, jiss mein zindagi bhar ek sufi gusul nahee karta, zindagi bhar nanga rehta hai, aur issi haal mein khutabe bhi deta hai.

Inn ke nazdeeq Mohammad s.a.w. hi khuda hain, aur khuda hi mohammad hain.
jaisa keh sufiyaun ke iss sher se maloom hota hai.

Wahi arsh par jo tha mustawiye khuda bann kar
Utar pada hai madeene mein mustafa bann kar

ISLAM aur TASAWWUF mein faraq:
ISLAM ke ilm ki bunyad ambiya aur paigambaraun ki wahee par hai. Goya keh ISLAM ke ilm ka maakhaz aur source ALLAH aur RASOOL hote hain.
Magar sifiyat ke ilm ki bunyad aur unn ka maakhaz aur source khayali wahee, shaitani wasaawis, mazmumah kashf aur ilm-e-gaib ke hussol ke dawe par hai.
Ye kabhi khud ALLAH ban jaate hain to kabhi ALLAH se baraye raasth kalam karte hain. Ye kabhi rasoolullah s.a.w. ko peeche chore dete hain to kabhi baraye raast rasool s.a.w. se mulaqat kar ke inn se ilm hasil kar lete hain.

ISLAM ke mutabiq qaynaat ka tasarruf karne wali zaat ALLAH ki hai,
aur inn sufiyaun ke mutabiq qaynaat inn ke tasarruf se chalati hai.

Sufiyana afkaar ke nuksanaat:
1. Musalmanaun ka QURAN aur HADITH se door hona.
2. QURAN aur HADITH ke maane aur matalib ko badala jaana.
3. ISLAMI AQEEDE ki barbaadi hona.
4. Fisq wa fujur aur fahash wa burayi ka iss ummat mein phail jaana.
5. Music aur mauseeqi inn ke nazdeeq halal hona, iss ka sunana aur iss par raqs karna yani nachana ye sab inn ka ibadat mein dakhil hona.

Hamari ooper ki tafseel se koi ye na samazhe keh hum ne sirf mazmoom aur galat sufiyat ki tardeed ki hai, balke hum ne har qisam ki sufiyat ki tardeed ki hai.
Ye baat iss liye bayan karni padh rahi hai kyun ki baaz logaun ki ye bhi galat fehmi hai keh sufiyat mein bhi alag alag darje hain, aur issi sufiyat mein ek paak aur sahee sufiyat bhi hai, jiss se tazkiye nafs ka kaam liya jaata hai.
Sufiyat aur uss ki gumrahi se bachane ke liye hum wahee usool lete hain jo ALLAH ke nabi s.a.w. ne bida’at ke talluq se bayan kiya hai, KULLU BIDA’ATIN DOLALAH yani harr qisam ki bida’at gumrahi hai. To issi tarah harr qisam ki sufiyat bhi gumrahi hai.
Sufiyat par koi 100% amal karta hai to koi 90, 80, ya 70% .
Kisi mein suiyat ka asar 30% hai to kisi par iss ka asar 10% hai.
Behre kaif, wallah, iss par amal ya kisi bhi qisam ka iss ka asar musalman ko gumrahi se nahee bacha sakta.

ALLAH hum sab musalmanaun ko iss ghinauni aur gandi gumrahi se bachaye aur apne seedhe aur sachche raste ki rehnumayi farmaye.

Aameeeeeeeeen, ya rabbal Aalameen.

————————
Note: Please dont alter / edit this msg when you are farwarding. This is one type of Khiyanat in the eye of writer.
Meharbani kar ke iss msg mein koi tableeli ya kami wa beshi na karein. Ye ek tarah ki khiyanat hai musannif ki nigah mein.
Aur kisi ki mehnat ko zaya karna achchi baat nahee.
————————

For more Que. / Ans. , visit here:
http://www.sirajinamdar.com/index.php/all-que-and-ans/

Agar aap Siraj bhai ke QURAN aur SAHEE HADITH ke msgs chahte hain to iss number par “Add Me” likh kar msg send karein,
WhatsApp No.: +918007775053